Reservuarium: вада з розных куткоў Беларусі

У менскім Цэнтры сучасных мастацтваў адкрыўся праект 11 мастачак «Чысьціня і гігіена». Выстаўленыя карціны, інсталяцыі ды арт-аб’екты аб’ядноўвае тэма чысьціні і духоўнай гігіены.

Прыкладную экалёгію з эзатэрыкай сумясьціла Кацярына Сумарава. Яе праект «Reservuarium» прапануе адчуць моц вады, аднаго зь першасных элемэнтаў. Мастачка закрыла ў 20 трохлітровых слоіках рэкі, крыніцы, азёры, сьвідравіны і вадасховішчы Беларусі.

reservuarium-04

Наведвальнікі выставы жартуюць — кажуць, што ўся вада з аднаго крана. Аўтарка ж праекту Кацярына Сумарава кажа, што ўсё было зусім ня так.

Паводле мастачкі, некалькі месяцаў неабыякавыя людзі дапамагалі зьбіраць ваду з розных абласьцей нашай краіны. Сама Кацярына не змагла б за кароткі тэрмін падысьці да Нёмана і да Альшанкі, да паўночнага возера Асьвеі і да паўднёвай ракі Прыпяці.

reservuarium-02

Дачка мастачкі, Марыя, прывезла ваду з Ракаўскай крыніцы. Паэт Уладзімер Някляеў даставіў слоік з вадою са сваёй Крыўлянкі. Прадстаўнікі арганізацыі «Багна» прывезьлі ваду з балотнага заказьніку «Ельня», што ў Мёрскім раёне Віцебскай вобласьці.

На выставе ёсьць пусты трохлітровы слоік — для ракі Нямігі, якая насамрэч ужо не цячэ. Побач зь ім — паўлітровы слоік зь першым вясновым дажджом, які назьбіралі супрацоўнікі «Гаррэмліўнясьцёку» з калектару «Няміга».

reservuarium-03

Выстава адчынена да 1 красавiка па адрасе Мiнск, Някрасава 3.

Радыё Свабода

Фота Кацярыны Сумаравай