На якой мове гаворыць з намі Палессе?
- Тэма: Багна
- Аўтар: Багна
- Час публікацыі: 15.12.2020, 02:22
Грамадскія арганізацыі «Багна» і «Ахова птушак Бацькаўшчыны» ад асобы кааліцыі экалагічных арганізацый «Захаваем Палессе» запрашаюць вас наведаць фотавыставу «Лексіка Палесся».
Фотапраект «Лексіка Палесся» прысвечаны ўнікальнай прыроднай каштоўнасці беларускага рэгіёна і яго культурнай самабытнасці.
«Лексіка Палесся» — гэта своеасаблівы дыялог паміж прыродай і чалавекам.
Фотапраект уяўляе сабой экспазіцыю прац беларускіх фатографаў, закаханых у прыгажосць роднай зямлі. Ён падзелены на тры тэматычныя часткі, кожная з якіх дазволіць гледачу пабачыць Палессе як натхняльную сваёй прыгажосцю каштоўную тэрыторыю з багатай біяразнастайнасцю; як цэнтр этнаграфічнай і гісторыка-культурнай спадчыны; як самабытны свет, які знікае ў выніку ўмяшальніцтва чалавека.
— Мы натхніліся на стварэнне гэтай выставы ў 2017 годзе, калі толькі пачыналі працаваць у рэгіёне Палесся. Чым больш мы даведваліся аб экалагічных праблемах звязаных з асушваннем балот, планамі па будаўніцтву воднага шляху Е40, знішчэнню пойменных дуброў; сустракаліся з мясцовымі жыхарамі, тым больш адкрывалі для сябе дзіўную частку Беларусі, якая можа стаць візітнай карткай нашай краіны.
Гэтая выстава — спроба прыўнесці ў сталіцу часцінку Палесся, яе ўнікальны пейзаж, пераплецены з бытам і традыцыямі палешукоў. Мы закранаем не толькі станоўчыя моманты, але таксама паказваем далікатнасць гэтага рэгіёну, які вось ужо 50 гадоў знаходзіцца пад моцным антрапагенным уздзеяннем. Унікальнасць выставы яшчэ і ў тым, што акрамя прыгожых фатаграфій 21 аўтара, мы прапануем кожнаму гледачу дакрануцца да дыялекту аднаго з рэгіёнаў Палесся — частку тэкстаў выставы нам дапамаглі перакласці палешукі. Сярод фатаграфій вы ўбачыце даволі вядомыя імёны фатографаў, але ёсць працы мясцовых жыхароў. Для нас важна паказаць, як яны адчуваюць сваю малую радзіму, дзе нарадзіліся і жывуць да гэтага часу, — дзеліцца сваімі ўражаннямі адзін з куратараў выставы, Чыкалаў Канстанцін, старшыня грамадскай арганізацыі «Багна».
Адкрыццё выставы пройдзе 17 снежня ў 18.30, ва ўнутраным дворыку Культ. цэнтра «Корпус», г. Мінск, пр-т Машэрава, 9 к8. Выстава пройдзе ў фармаце open-air і працягнецца да 31 снежня. Уваход вольны.
Дворык працуе з 10:00 да 21.00 штодзённа.
У сувязі з эпідэміялагічнай сітуацыяй у краіне, звязанай з COVID-19, усіх гасцей просім выконваць меры прафілактыкі — выкарыстоўваць маску, апрацоўваць рукі антысептыкам, а ў выпадку хваробы заставацца дома.
Выстава арганізаваная грамадскай арганізацыяй «Багна» ад асобы кааліцыі экалагічных арганізацый «Захаваем Палессе» («Save Polesia») ў межах праекта «Устойлівае развіццё экалагічнага патэнцыяла дзікай прыроды ў Прыпяцкім і Палескім рэгіёнах» пры фінансавай падтрымцы Франкфурцкага заалагічнага таварыства (Zoologische Gesellschaft Frankfurt).
Загалоўнае фота — Павел Лычкоўскі.
Публікацыя фінансуецца Франкфурцкім Заалагічным Таварыствам (ФЗТ). ФЗТ неабавязкова падзяляе меркаванне, выказанае ў гэтым матэрыяле.
![Разліў на Прыпяці ў 2017 годзе, Лельчыцкі р-н. Падчас разліву рака шукае сабе мноства іншых шляхоў, затопліваючы шырокую пойму. Пасля сыходу вады там вырасце высокая трава, у якой там-сям будуць стаяць адзінокія дубы — неверагодна маляўнічы пейзаж. А вось так залітая пойма выглядае зверху.](/files/optimized/5fd842e22a5d42073197387d.jpg)
![Нібы ткуць ручнік — дарогу радасці да шчасця і дабрабыту. Водзяць карагоды і спяваюць, потым закопваюць у зямлю «сулу» — хаваюць цёмную сілу разбурэння, пераўтвараючы ў дабро, багацце і поспех.](/files/optimized/5fd844dc2a5d420731973881.jpg)
![Рака Прыпяць, шырокая водмель ў перыяд засухі.](/files/optimized/5fd844292a5d420731973880@2x.jpg)